کیلیفورنیا میں سیاحتی بس ٹریکٹر سے جا ٹکرائی، 13 ہلاک، 31 زخمی

جنوبی کیلیفورنیا کی قومی شاہراہ پر سیاحوں کو لے جانے والی ایک تیز رفتار بس اور ٹریکٹر میں تصادم کے نتیجے میں 13 لوگ ہلاک اور 31 زخمی ہوگئے۔ مقامی میڈیا نے اپنی رپورٹ میں کہا کہ واقعہ لاس اینجلس شہر سے 100 میل مشرق میں پیش آیا۔ حکام نے حادثے میں 13 لوگوں کے مارے جانے کی تصدیق کردی ہے۔ حادثے کی تصاویر میں سیاحوں کی بس کے سامنے کا حصہ تصادم کے بعد مکمل طور پر تباہ دکھایا گیا ہے۔ بس ٹریکٹر کے پچھلے حصے سے ٹکرائی تھی۔ ایک ٹرک کی مدد سے دونوں



گاڑیوں کو ایک دوسرے سے الگ کرنے کے بعد بچاو کارکنوں نے بس میں داخل ہونے، لاشوں اور زخمیوں کو نکالنے کیلئے لوہے کی سیڑھی استعمال کی۔ زخمیوں کو علاج کیلئے مقامی ہسپتال منتقل کردیا گیا۔  رپورٹ کے مطابق بدنصیب بس کیلیفورنیا کے شہر سالٹان سے لاس اینجلس جا رہی تھی کہ راستے میں حادثے کا شکار ہوگئی۔ پچھلے مہینے کی 29 تاریخ کو بھی امریکی ریاست نیو جرسی میں مسافر ٹرین حادثے کا شکار ہوئی تھی جس کے نتیجے میں 3 مسافر ہلاک جبکہ 100 سے زیادہ زخمی ہوئے تھے۔